अस्तित्वाची लढाई

शिवबा सारखा पुत्र जन्मावा अशी सर्वांची आस 

मग जिजाऊ जन्मली म्हणून का करता त्रास 

स्त्री - पुरुष समानतेची नुसतीच बढाई 

का ? नेहमी माझ्याच वाट्याला अस्तित्वाची लढाई

 

असं म्हणतात मुलगी म्हणजे आई - वडिलांचे नाक 

पण असतो का यांचा वंशाच्या दिव्यावर धाक 

कोणी समजून घेईल का माझ्या उत्पत्तीची  कहाणी 

का ? विसरतो समाज स्त्री अस्तित्वाची निशाणी 

 

राब-राब राबले तरी सासरच्यांचा नजरेत नेहमीच कमीपणा 

स्त्री अवहेलना करताना उंचच उंच यांच्या माना 

स्त्रीला तूच्छ लेखून कसली समजतात शान 

का ? लक्षात येत नसेल बरं माझ्या अस्तिस्त्वाचं भान 

 

स्त्रीवर नेहमीच  रूढी - परंपरांची पगडी 

२१ व्या शतकातील पोकळ समाजव्यवस्था उघडी 

स्त्री शक्तीच्या जाणिवतेचा घ्यावा लागणार धडा 

का ? मीच द्यायचा माझ्या अस्तित्वाचा लढा  

 

नेहमी केल्या जातात स्त्रीकडून न संपणाऱ्या अपेक्षा 

अजूनसुद्धा द्यावी लागते पवित्रतेचे अग्निपरीक्षा 

किती काळ पटवून  द्यावी लागणार  स्त्रीची गाथा 

का ? कोणी समजून घेत नाही माझ्या अस्तित्वाची व्यथा  

 

स्त्री - पुरुष समानतेची नुसतीच बढाई 

का ? नेहमी माझ्याच वाट्याला अस्तित्वाची लढाई 

- निरंजन हिंदुराव जाधव